متحدہ عرب امارات نے کوویڈ19 کی نئی قسم کے بعد سات افریقی ممالک کے مسافروں کے داخلے کو معطل کرنے کا اعلان کیا ہے۔

جنرل سول ایوی ایشن اتھارٹی اور نیشنل اتھارٹی برائے ایمرجنسی کرائسز اینڈ ڈیزاسٹر منیجمنٹ نے جنوبی افریقہ، نمیبیا، لیسوتھو، ایسواتینی، زمبابوے، بوٹسوانا اور موزمبیق کی تمام پروازوں اور ٹرانزٹ مسافروں کے لیے بھی داخلہ معطل کرنے کا اعلان کیا ہے۔

 سفری معطلی کا اطلاق 29 نومبر سے ہوگا۔ 

 اس اعلان کے مطابق ان مسافروں کا داخلہ بھی معطل ہے جو متحدہ عرب امارات آنے سے پہلے 14 دن کی مدت کے دوران ان ممالک میں تھے۔ تاہم، پروازوں کو متحدہ عرب امارات سے ان ممالک تک مسافروں کو لے جانے کی اجازت ہوگی۔

 سرکاری وفود، متحدہ عرب امارات کے شہری، متحدہ عرب امارات اور ان ممالک کے درمیان منظور شدہ سفارتی مشن اور گولڈن ویزا رکھنے والوں کو استثنی حاصل ہے۔

 استثنی گروپ پر احتیاطی اقدامات کی پابندی لازمی ہے جس میں 48 گھنٹوں کے اندر پی سی آر ٹیسٹ اور روانگی کے وقت سے چھ گھنٹے کے اندر ائیرپورٹ پر تیز رفتار پی سی آر ٹیسٹ کروانا شامل ہے جبکہ اس کے علاوہ ائیرپورٹ آمد پر پی سی آر ٹیسٹ کروانا بھی شامل ہے۔ 

 نئے قواعد کے مطابق متحدہ عرب امارات کے شہریوں، سفارت کاروں اور گولڈن ویزا رکھنے والوں کو 10 دن کے قرنطینہ کرنے اور ملک میں داخل ہونے کے نویں دن پی سی آر ٹیسٹ بھی کروانا ہو گا۔

سول ایوی ایشن کی جنرل اتھارٹی نے تصدیق کی ہے کہ ان ممالک کے مسافر جو دوسرے ممالک کے راستے یو اے ای آتے ہیں ان کو ملک میں داخلے کی اجازت کے لیے ان ممالک میں قیام کی مدت 14 دن سے کم نہیں ہونی چاہیے۔ 

 اس اعلان میں متحدہ عرب امارات کے شہریوں کو جنوبی افریقہ، نمیبیا، لیسوتھو، ایسواتینی، زمبابوے، بوٹسوانا اور موزمبیق کا سفر کرنے سے بھی روکا گیا ہے سوائے سرکاری سرکاری وفود، ہنگامی طبی معاملات اور سفارتی مشن کے۔ اتھارٹی نے فیصلے سے متاثرہ تمام مسافروں سے مطالبہ کیا کہ وہ اپنی پروازوں میں تبدیلی اور شیڈول کے لیے ایئر لائنز سے رابطہ کریں۔

 اس سے قبل، متحدہ عرب امارات کے کیریئر ایمریٹس اور اتحاد نے اعلان کیا تھا کہ وہ جنوبی افریقہ سمیت سات افریقی ممالک سے پروازیں معطل کر دے گا۔

 ایمریٹس کی جنوبی افریقی شہروں جوہانسبرگ، کیپ ٹاؤن اور ڈربن سے دبئی جانے والی پروازیں 29 نومبر سے معطل رہیں گی۔ اتحاد 30 نومبر سے جوہانسبرگ سے سفر پر پابندی لگائے گا۔ 

نئی کوویڈ19 قسم کے بعد یورپ، امیت کئی ممالک نے افریقی ممالک پر سفری پابندیاں عائد کر دی ہیں۔ ڈبلیو ایچ او نے نئے وائرس اومیکرون کو تشویشناک قرار دیا ہے۔

 ایمریٹس کا جنوبی افریقی ممالک کے لیے پروازیں معطل کرنے کا فیصلہ دبئی کوویڈ19 کنٹرول اینڈ کمانڈ سینٹر کی ہدایات کے مطابق ہے۔